وتر المنافي - حمزة الحلفي

من طرف **احمد الاعسم** 19/7/2009, 11:35 pm

وتـر المنافـي

وانتهت بيك المسافات البعيدة
بليل طافي..
ووكرت حطيت حملك
جنطة مليانه صبر
وي عود اخرس
باگت السانه المنافي
وشايل بجيب القميص..
آخر قصيدة
انكتبت بصندوگ (أبوسرحان)*
مابيها قوافي!..
وبوسه من شفة احديثه
انطبعت من اسنين..
كل ساعه تبوسك
يلي عمرك ماگلت للبوس كافي!..
شيل كاسك ..
وكاسره بخيط الفجر
هسه ابتديت..
واشرب بصحتك عوافي
لاتگل للخمرة كافي؟..
ولاتگل للسهر كافي
ولاتگل للعود كافي
ولاتگل للبوس كافي
اشگد ثلج غافي اعله شعرك
وانته دافي!..
يل مشيت لوحدك
صيف اعله صيف
بلايه كلشي
وسجة حزيران ماتعذر الحافي؟..
وهذا عمرك..
كله عمرك
مانمت باحضان ليلك
بعت جفنك للصبح
وتگلي غافي!..
گوم افتح للشمس ..
ضيف اعله بابك
ضاويه وتشبه ضحكتك
وصافيه شلون انته صافي
انته من تروح..
اتخضّر الف "كوكب" بنفسج
وريحة ابخور
ووشم حنه
وجفافي
وانته من تروح شجرة..
تنثر اعله الگاع
وي الفي أغاني
مارويت من العطش ..
يوميه غربه ؟..
تنام غربه
تصحه غربه
تمشي غربه
وحتى امانيّك غريبه اعله الاماني!..
لاتضم الغنه بصدرك
غنّي بيـّه..
الليل بعده بأوله
والشعر هّد روحه هسه
وكله اجاني
مشط اوتارك باصابيعك
كتلها الشوگ من اسنين
جلمتهه اعله شفتهه وتتاني؟..
لاتضم الغنه بصدرك
شگد مسافة شوگ بيك
اتفر على "القاسم"* صواني
وشگد حنين بريسم يفيض اعله طولك
تغفه بـ "العشار"* ليله
وتشبگ اوداع المواني!..
المستحه ولايه بوسط روحك
شبابيج وحدايق
ومن اجيتك..
گلبت روحي أجسّهه
... شفتك آني
شفتك بعيني
مثل نجمة صبح
حـنّت شعرها
وحنّة النجمه ضوه
ونسلت الغبشه
بمشط ياقوت ضفرتلك گصيبة
وسبحت بماي الهوى!..
وطبگت الشفتين
شفة الگاع وشفاف السمه
وناموا سوه!..
وغنّي بيّه
الليل يا "كوكب" طويل؟..
يريد خاطر
وعيني بعناد السهر..
تنام وكحه
وماتفز الا اعله باجر
رشفة "الريان"* بـ "البلور"* نشوه
وكاس يترس كاس
والواهس يكاسر !..
و "باب توما "* ملون طويرات گاع
اشگد خذن حسرات منك ؟..
ويّ دخان الجگاير
وهم بعد عندك خلگ
وتگول اسافر ؟..
سافر..................
سافر ابجنح النهار
عيونه تحجي
ولاتصدگ بالظلام
الليل اخرس
ونسة المضنوك يفرح
وانته ليش وي الحزن
دوم اتونـّس ؟!..
غنّي بيـّه ...................
وابجي بيّه
ولاتگل للدمعه بس؟..
ماترد...
ماترد..
يامن عذرتك
انزع الغربه
وتعال وجيب عمرك
گبل ليدگ الجرس!..
گبل ليدگ الجرس!..

من طرف **احمد السجادي** 20/7/2009, 4:24 pm

الله الله عليك قصيدة روعة تتقبل مروري

[ندعوك للتسجيل في المنتدى أو التعريف بنفسك لمعاينة هذا الرابط]

من طرف **احمد الاعسم** 28/7/2009, 11:29 pm

يسلمووووووووووووووووووووو

وتر المنافي - حمزة الحلفي

وتر المنافي - حمزة الحلفي

رد: وتر المنافي - حمزة الحلفي

رد: وتر المنافي - حمزة الحلفي