العراق آني - شعر شعبي

من طرف **احمد الاعسم** 6/7/2009, 12:43 am

--------------------------------------------------------------------------------

العراق آني - شعر شعبي

عبد الجليل الجبوري

العراق آني
يا من تسألني عنواني
على شَط الفُرات اربِيت
ومَي دجلة الزلال بعطَش رَوّاني
راضِع من صَدر گاعي
ونخَلهَا العالي ربّاني
الرّطَب من جوع حاماني السعف من برد دفّاني
هوى العالي بدلال بزغر لاعبني
واِجا يرفرف بقمصاني
العراق آني

المجد والجود جنحاني
ترا شَمس الصُبح گُصتي
وسُواد الليل لو مشّطت يغشاني
نُجوم الليل وَي شُهبه
المشِيب يشعْ على زلوفي
الگُمر لو ضِحكت اسناني
فضاء الكوْن بِيت أهلي
الثريا تضوي بنياني
كتَبتْ اسمي على الزُّهره
وزحل بِعْتاب ناداني
شلُون تخط على الزُّهره
وانا المهيُوب تنساني
العراق آني
الكواكب طافت ابّيتي
تطوف، تصلّي لآذاني
مثل طول الرمح طولي
الكرم لو مدّت ايماني
اليسار تيسِّر الكلفة
إذا كلَّفَت خوّاني
العزم حيلي العدل سيفي
القسط من الأزل ميزاني
أنا الضَّيَّفت آدم
سَفينة نوح ما فارَگت شطآني
الخليل ابني أبو اسماعيل جد النبي العدناني
وبعد تردون عنواني؟
العراق آني
واكمْلِلكُم!
اذا جرحْ انجرَح وهران
ينزف يظل شرياني
حَمِيت الدار ويّا الجار ما غلّگت بيباني
يفُوح الهيْل من دَلتي
وبنّ الفخر فنجاني
صُواريخ اشهَرت سيفي
تحدَّى وشُوف بُرهاني
تدكّ ديَار عادِيهم
ترجّف خُوف عِدواني
چم علْج انذِبح باهوَال گِيعاني
بميلادي تسجّل مَولد التاريخ
وجنسيتَه بخَتم من سِجل دِيواني
علَّمتَه يخُط اول حرف بِيدي
ويحْسِب نُسَخ قُرآني
العراق آني

وفي لأهلي
ولو حالفوا عدواني
أعز ضيفي
ولو خانُوني جِيراني
تِبْرا جرُوحي واَتْعافَى واَردْ لصَدر دِيواني
وافتح صَفحة بكْتَابِي
جِديدة وتِزهي بالواني
واسمّيها الشرف ما هان
تعَالوا وشُوفوا هذا آني
واسَطِّرها بدم وليدي
واخل تشهد على الجاني
وبعدها يصير إلنا حساب
نصُف واحد ورا الثاني
نحاسبكم على الزلّه، على الچلمه
نجيب الگاصي والداني
وراها العفو شيمتنا
لأن فعلاً چبير آني
العراق آني